domenica 29 dicembre 2013

Affacciati – Poesia di Nicola Paparo

Palazzo Drammis a Scandale in una foto di Cesare Grisi

AFFACCIATI
Affacciati, beddra, affacciati, amata,
affacciati priestu ca sugn’arrivatu.
Ti puort’ i saluti di mamma e di tata,
‘i tutt’i parent’e d’u mia vicinatu.
‘I d’uor’ ‘u ti puortu collan’ed aneddra,
ma cori gentil’e nu paru di spaddre
ca tat’ha ‘maparatu a ‘mbastu ed a seddra.
Hajiu sutta la peddra ‘na forte cudiddra
ch’ ‘a mamm’ha curatu ccud’uojiu e murtiddra.
‘U jiri sintiendu a chistu ed a chiddru
ch’ ‘u sugnu malatu nè tiegnu gariddri.
Ad ogni affacciata mi pari cchiù beddra,
‘na ros’addurusa, d’u cielu ‘na stiddra.
Ccu l’uocchi ti mandu di fuocu fajddra
e ppi ri labbruzzi ch’ancora nu’ vasu
ccu mamma ti mandu ‘na cist’ ‘i cirasi.
Mo’, beddra mia, tras’ e a cunocchia ed a fusu
‘u perdiri tiempu, ca sugnu gilusu.


NICOLA PAPARO