 |
| Il centro storico di Scandale in una foto d'epoca (Archivio Aprigliano) |
U PANARU I VIRDEDDHI
Na vota a giuvinama i di
paisi era spartuta in duva catigorji: i contadini, i cchjù, e ri studenti,
pochi e furtunati. A differenza i di duva categoriji si vidìa sulu d’estati,
ppicchì i primi eranu for’a fatigari i da matin’a ra sira, e ri sicundi
cionduliavanu tutt’u juornu u paisi paisi; s’avanu ripusari i da fatiga i du
studio, povarieddhi!
Prima i jiri avanti, aju
parrari nu pocu i di studenti.
Ppi “studenti”, tandu,
s’intindivanu sulu i liceali, i ginnasiali cuntavanu pocu, ppicchì erano
sempr’i menu. Puru c’u liceu durava sulu tre d’anni, e ru ginnasiu cinqui, u
primu s’inchjìa d’ogni d’annu i chjù, ppicchì ddha i studenti appiddhavanu.
Chiri pochi chi riuscianu a ghjiri all’università, si pirdianu i du tuttu.
I studenti i Scandali
tinianu puru na speci i divisa:
A) cavuzi curti (ca iddhi
chiamavanu pantaloncini): avanu d’essiri larghi e ccu ri passanti, ma senza
currija, ppicchì avanu stari sutt’u jippu.
B) cammisa (ppi d’iddhi
camicia): s’ava ddi purtari senza cannottiera, sbuttunata e ccu ri pizzi i da
fadeddha annudati. Sa particularità era sulu i da loro. Ija, ca già i ninnu,
ava dicisu i studiari, picchì i randu, ù bulìa minari a zappa (v’ aju pruvatu
sulu na vota ccu ru zzapunieddhu e m’aju mpacchjatu na bott’a ra frunta i da
gamba, ca m’à fattu zzoppiari ppi tre misi e m’à lassatu u signu ppi tramenti
campu), era d’ancora nu quatrarieddu quandu, nu juornu, sorma a randa s’ava
d’arrizzicatu a mm’annudari i pizzi i da fadeddha. Anima i da madosca! nu
studenti mi stava manciandu vivu e l’autri, stizzati, ca li dunavanu ragiuni; e
siccomi l’ava mandatu dirittu dirittu a ru cucinaru, m’ava d’assecutatu ppi
tutt’a Coddha, i du barru i Piertru i Girda fin’a ra casa mija, dduvi
n’aspittava ra mamma, ca l’ava d’amminazzatu i l’affraccari na copanata a ra
capu ccu ru vetti i da scupa si sulu mi tuccava ccu nu jiritu.
C) i zuocculi i lignu,
ca, cumi si dicìa da ru paisi, ava ppurtatu ppi ra prima vota a Scandali Pantu
i Pasquali u mbastaru: i strascinavanu locchi locchi u paisi paisi e, cum’i
camapneddhi i di zimbari, si sintianu i luntanu.
Ogni tantu, ppi nnu ssi
fari piari i picundria, armavanu, a sir’a ru friscu, na partita i palloni. Ija
mi l’arricuordu chiddhi partiti, e m’arricuordu puru i paroli d’inglese
c’accumpagnavanu i partiti; vi vuogghju prima fari nutari ca tandu si studiava
sul’u francesi.
Na partita, pua, mi
l’arricuordu chjù ddi l’autri. V’assistìa nu contadinu, ca era da ra casa
ppicchì s’ava tagghjatu duva jiriti ccu ra facigghja, era d’assittatu vicin’a
mmija.
I studenti scandalisi
jucavanu contr’i studenti santamarisi e pirdianu a ra bbona. I spettatori eranu
arraggiati ccu l’arbitru, e d’ogni bota ca i jocaturi nuostri piavanu a palla,
ancunu gridava: - Arbitru, duvi l’a’ l’uocchji? Chirddhu ù d’era n’offisaid. -
Oppuri: - Arbitru fitusu,
u vo’ dunari o no su pènalti? -
O mbeci: - Arbitru
disgraziatu, ma ù ru vi’ c’u terzinu desrtu i Santumaguru quand’usa ru techil è
pieju i na stragula? -
Ma l’arbitru ù lli
dav’adienza mancu ppi nnenti, ù ri carculava, mancu quandu ricugghjìa d’ancunu
sciuoddhu o ancuna maliparola.
Chiru povaru cuntadinu,
ch’era d’assittatu vicinu a mmija, quandu sintìa chiddhi strani paroli, facìa
signi ccu ra capu, ccu ri spaddi e ccu ri manu, cumi ppi diri: “Ma cchi cacchju
stanu smammandu chisti dduocu?”.
A nu certu puntu, u
studenti, ch’era d’assittatu d’avanti a mmija, s’izà e purtà ri mani a ra
vucca: - Hoi cosa fitusa i d’arbitru, chistu la dari, è nu corner. –
U contadinu s’izà
pur’iddhu e tuccà ccu na manu a spaddha i du studenti c’ava gridatu:
- Subra chistu tieni
propriu ragiuni, e mmo ti fazzu a bidiri si chiru fitusu ca fuja d’ammienzu u
campu, ca mi para nnu taguru ccu ra musca, mi duna d’adienza. –
Allargà ri gambi, si misa
ra manu destra vicinu a vucca e rapirì ri gorgi:
- Hahu, arbitru, armenu
nu cuornu u po’ dunari, ppicchì tieni chjù corna tu ca nu panaru chjinu chjinu
i virdeddhi. -
L’arbitru, appena sintì
chiddhi paroli, jittà ru frischiettu nterra e ncignà da fujìri mbierz’u
contadinu, ca si vutà di spaddhi e si ndi jì locchi locchi.
All’intrasatta successa
ru finimundu: i jocaturi s’aggaddhavanu intr’u campu e ssi ndi dunavanu i santa
ragiuni, i spettaturi scandalisi si scambiavanu vajaneddha frisca ccu ri
spettaturi santamarisi, e duva o tre studenti avanu piatu l’arbitru e ttu
stavanu cunzandu a ri frisculi.
Ija, appen’ava bistu a
malaparata, m’ava d’izatu e m’ava d’abbicinatu a ru contadinu. Quandu arrivammu
fora i da zona i periculu, iddhu si vutà mbierz’u campu i palloni e scotulà ra
capu nu paru i voti. Pua mi guardà d’intra l’uocchi:
- E menu mali ca su’
studenti. – Si girà e cuntinuammu a ccaminari. Doppu na decina i passi si
firmà: - Ma… puru tu si studenti? – Ancora no, ma cci vuogghju divintari.
Mi misa na manu subr’a
spaddha e ccu fari prioccupatu: - Povarieddhu a ttija, s’a’ fari sa fini!
